നടി കവിയൂർ പൊന്നമ്മയുടെ മൃതദേഹം പൊതുദർശനത്തിന് ശേഷം ഇന്ന് സംസ്കരിക്കും.രാവിലെ 9 മണി മുതൽ 12 മണി വരെ കളമശ്ശേരി മുനിസിപ്പൾ ടൗൺ ഹാളിലാണ് പൊതുദർശനം. സംസ്കാരം വൈകിട്ട് 4 മണിക്ക് ആലുവ കരുമാലൂർ ശ്രീപദം വീട്ടുവളപ്പിൽ നടക്കും. നിലവിൽ ലിസി ആശുപത്രിലാണ് മൃതദേഹം സൂക്ഷിച്ചിരിക്കുന്നത്. വാര്ധക്യസഹജമായ രോഗങ്ങളാൽ ഇന്നലെയാണ് മരണം സംഭവിച്ചത്. എറണാകുളം ലിസി ആശുപത്രിയില് വെച്ചായിരുന്നു അന്ത്യം.
ചെറുപ്രായത്തില് തന്നെ സംഗീതം അഭ്യസിച്ചു തുടങ്ങിയ കവിയൂര് പൊന്നമ്മ 14ാം വയസില് നാടകത്തിലേക്ക് ചുവടുവെച്ചു. തോപ്പില് ഭാസിയുടെ പ്രശസ്തമായ 'മൂലധന'മായിരുന്നു ആദ്യകാലങ്ങളില് പൊന്നമ്മ ഭാഗമായ പ്രധാന നാടകങ്ങളില് ഒന്ന്. പിന്നീട് കുടുംബിനി എന്ന ചിത്രത്തില് രണ്ട് കുട്ടികളുടെ അമ്മയായി അഭിനയിച്ചുകൊണ്ട് വെള്ളിത്തിരയിലേക്ക് എത്തി.
1960കള് മുതല് 2022 വരെയുള്ള വരെയുള്ള അര നൂറ്റാണ്ട് കാലത്തോളം സിനിമയില് നിറഞ്ഞുനിന്ന പൊന്നമ്മ നാല് സംസ്ഥാന ചലച്ചിത്ര പുരസ്കാരങ്ങളടക്കം നിരവധി നേട്ടങ്ങള് സ്വന്തമാക്കിയിട്ടുണ്ട്. 1971,1972,1973 എന്നീ വര്ഷങ്ങളില് തുടര്ച്ചയായും പിന്നീട് 1994ലും മികച്ച രണ്ടാമത്തെ നടിയ്ക്കുള്ള പുരസ്കാരം നേടിയത് കവിയൂര് പൊന്നമ്മയായിരുന്നു.
സിനിമയ്ക്കൊപ്പം ടെലിവിഷന് സീരിയലുകളിലും പൊന്നമ്മ സജീവമായിരുന്നു. മാത്രമല്ല, സിനിമാ-നാടക പിന്നണി ഗാനരംഗത്തും പൊന്നമ്മ കഴിവ് തെളിയിച്ചിട്ടുണ്ട്. നിര്മാതാവായ മണിസ്വാമിയെയായിരുന്നു കവിയൂര് പൊന്നമ്മ വിവാഹം കഴിച്ചത്. 2011 ല് മണിസ്വാമി അന്തരിച്ചു. മകള് ബിന്ദു അമേരിക്കയിലാണ് താമസം.
വാർത്തകൾ വാട്സാപ്പിൽ ലഭിക്കാൻ